غبتي عني

غبتي عني لكن قريبة ... وتهتي مني لكن جوايا
ما تقوليش دي حاجة غريبة ... ده أنا لقيتك فيا ومعايا
لقيتك نسمة حواليَّ ... لقيتك ضحكة الدنيا
وشفتك بسمة في سمايا ... ولقيت الدفا في هوايا
وصوتك العذب في وداني ... وضحكتك مالية وجداني
لقيتك صوت يعزيني ... وصورتك ما فارقتش يوم عيني
حبيتك حب مش عادي ... ودبت في شوق ومش هادي
حبيتك حب النجوم للقمر ... وحب العشاق للسهر
وحب العصافير للشجر ... وحب الأرض للمطر
بشوفك كل ثانية في خيالي ... وعمرك ما تهتي لحظة عن بالي
يا حب عمره ما عرفته قلوب ... يا حب خلى قلبي يدوب
يا قلب زايد في جماله ... عمر ما الحب شافه في خياله
غبتي عني لكن قريبة ... وتهتي مني لكن جوايا
في صوتك إحساس بالدفا ... ينسيني همي وكل الجفا
يا بنت جميلة ونقية ... يا بنت لذيذة وشقية
يا ما أحلى الحب لو ليكي ... يا ما أحلى الشعر لو فيكي
يا أجمل حبيبة في الدنيا ... توهتيني ودبت من ثانية
يا نور لعيوني ولقلبي ... يا شمعة تدوب عشان حبي
يا قلب جميل كدة وصافي ... يا إحساس عالي قوي ودافي
يا حب يتوه العاشقين ... مهما كانوا عتاة جامدين
عرفت الفرحة وأنا معاكي ... عشقت العيشة في هواكي
مستنيكي عمري يا عمري ... مهما اتحيرتي في أمري
وعن قريب راح تجيني ... عشان أحسك وتضميني
يجمعنا شوقي في أحضانك ... ترجعلي حياتي في زمانك
ما تقوليش دي حاجة غريبة ...ده أنا لقيتك فيا ومعايا
غبتي عني لكن قريبة ... وتهتي مني لكن جوايا

كل ده حب يا بنت الإيه؟

1. حبيبتي أجمل بنت في الدنيا ... بدفاير وعينين حلوين
2. حبيبتي أحلى بنت في الدنيا ... تتوه لو شفتها ثانيتين
3. جميلة قوي وقلبها حنون ... ملكة قلبي وكل الكون
4. حبها ساكن جوة وأكتر ... أعمل إيه ما هي زي السكر
5. عمري ما يوم فكرت نويت ... أحب وأقع وأقول مليت
6. ما هو كل إللي بيحب بيزهق ... وكل إللي بيعشق يغرق
7. بس غرقت في يوم وبسرعة ... شدتني كدة وبقى قلبي ولعة
8. كان جوايا أسد وكأنه ما كان ... ما تظهر وتبان عليك الأمان
9. سبتني وجريت كدة يا جبان ... واتقفشت وع الناس صعبان
10. حبيتها حب كدة مجنون ... حبيت عيونها وقلبها الحنون
11. حبيتها كدة زي ما هي ... حبتها وبهدلتني حنية
12. قلت لها عايزك تكوني ليا ... وكانت هي اللحظة المستخبية
13. خدتني من شوق على شوق ... وحب منه مش عارف افوق
14. عملت ايه في نفسي بس ... انت لسة بتحكي ما تسكت هسس
15. أنا إللي جبت ده كله لقلبي ... أنا ما قدرتش أقول له يخبي
16. خلاص بقى كان إللي كان ... وقعت واقف بس غلبان
17. كل ده حب يا بنت الإيه ... بالراحة على قلبي كفاية عليه
18. وحلفت أوريها أنا مين أنا ... ده أنا إللي دوبت الهوى
19. أنا إللي في عينيا الدفا ... لو كل الناس في قلوبهم جفا
20. أنا إللي هديكي الحنان ... أنا هنا سلطان الزمان
21. الحب ده لعبتي من زمان ... اصحى وفوق أنا مش غلبان
22. خلاص بقى أنا واحد جديد ... عينين حنونة وقلب حديد
23. هحافظ عليكي طول السنين ... ما يقدر عليكي ولو تنين
24. الحب يقوي مش بيضعف ... الحب قوة مش بتخوف
25. حبك خلاني أحب الناس ... أشوف التايه والمحتاس
26. أصل الحب ده حاجة جميلة ... يخلي قلبك أيامه طويلة
27. حب بجد وصدق وشوق ... حب بلهفة هتفضل فوق

لازم البُعد عشان نعيش

1. هو كان لازم البُعد عشان نعيش ... راح فين يا قلبي الوعد ولا خلاص مفيش
2. كنا بنقول احنا لبعض طول السنين ... كنا بنخاف نبعد عن بعض ولو ساعتين
3. بس طلع إنه مش بإيدينا القُرب ... لازم نفترق عشان نحافظ ع الحب
4. هي الحياة كدة.. أهلاً مع السلامة ... هي الحياة كدة.. هات وبلاش ملامة
5. هي الحياة كدة.. اخد وعطا ... هي الحياة كدة.. من غير غطا
6. الدفا من جواك وربنا إللي معاك ... يقدر يديك سلام ما هو ياما اداك
7. مالك يا قلبي تعبان.. متغير ... مالك متحير.. ده انت لسة صغير
8. جاهد واتعب واجري جري الوحوش ... بس بسرعة احسن ما تلحقوش
9. قطر الحياة بيجري.. اركب ... اركب ما هي الحياة كدة لازم تتعب
10. إللي بيتعب بيلاقي وإللي لأ مابيلاقيش ... هو كان لازم البُعد عشان نعيش؟
11. لسة في الدنيا ياما كتير ... لسة يا قلبي كتير مشاوير
12. ناوي تكمل ولا هتخلع ... ولا نصايحي ليك راح تسمع
13. اقدر ع البُعد لا يقدر عليك ... ده الفجر طالع هتشوفه بعينيك
14. دي الدنيا مهما راحت وجت.. طلعت ونزلت ... ما هتقدر علينا ومنها هنفلت
15. خايف ليه بس وقلقان ... شايفك كل ليلة قاعد حيران
16. ربنا ياما اتدخل وياما غير وقواك ... ربنا ياما ساعدك وياما نجاك
17. دي لو نسيت الأم رضيعها هو أبداً ما بينساش ... ولو زادت هموم الدنيا عينه عليك ما بيشلهاش
18. وإللي بعيد أهو بكرة يقرب ... وإللي ما جرب مسيره يجرب
19. ابعد بإرادتك عشان تقرب في يوم ... قبل ما تغصبك الحياة تعيش في هموم
20. حاول جرب شد وروق ... يلا إلحق اصحى وفوق
21. اوعاك تقول ده خلاص مفيش ... فعلاً كان لازم البُعد عشان نعيش

أزمة ضمير

هو ضميرنا انتهى ولا إيه؟!! نسينا ودسناه بس ليه؟!! ولا خلاص إحساسنا راح وبقى سهل علينا نشوف الناس في جراح
يا ناس احنا بقينا في أزمة بس أزمة من نوع خاص... بقى عندنا أزمة في الضمير ومابقاش يهزه أي كبير
امتى بقى نفوق ونخاف ربنا ونحس بغيرنا ونلم نفسنا
ناس بتموت قدامنا... عادي، ناس بتموت من إهمالنا... وبرده عادي
مستشفيات مليانة بحالات كتيييييييييييييير بتزيد بسبب الإهمال والجهل وإنعدام الضمير... ناس بتشوف الويل لمجرد إن القدر حطهم تحت رحمة ناس معندهاش ضمير ولا إحساس
زميل ليا حطه القدر قدام أتوبيس خبطه... والكل عارف أو سمع عن خبطة الأتوبيس... ولاد الحلال خدوه على أقرب مستشفى عشان يركنوه حوالي ساعة منغير ما يعبروه وقدهم أو أكتر عشان يعملوله إشاعات... لما افتكروا إن في حاجة مفروض تتعمل اسمها إشاعات... مش عارف ممكن أسمي ده إيه.. هو ده إللي بيقولوا عليه جهل ولا تخلف.. صدقوني ما أنا عارف أصنفه تحت أي مسمى
وبعدها نقلوه عشان يعمل إشاعة مقطعية وربنا مايوريكم... اتحكالي إنهم حطوه في عربية إسعاف أو بالأصح طفطف إسعاف ولا ميني عربية إسعاف... يا عيني عربية نونو مش مكفية السرير وراسه طالعة برة... حاجة آخر حلاوة... من الآخر قلة أدب
أهله نقلوه مستشفى تاني بيقولوا عليها كبيرة ومحترمة و... حكومية
عشان تاخد حقك لازم بالصوت العالي والشكاوي... ناس تخاف ماتختشيش.. مايجوش غير بالعين الحمرا أو بالواسطة إللي توصلك لمدير المستشفى عشان يتدخل... حتى في أقل حقوقك كمريض إنك تلاقي حد يتابعك بالإضافة طبعاً للحالة الخطيرة إللي محتاجة متابعة وعناية ورعاية من نوع خاص عشان التطورات إللي بتحصل للحالة
يا ناس ده لو مش حتى حقي ولازم أخده وده شغلهم أساساً ودورهم... على الأقل في حاجة اسمها إحسااااااااااااااااااااااااس. وبيبقى عند البني آدمين إللي باينهم انقرضوا وبقوا قليلين في الزمن ده
إحنا بنعاني من أزمة بجد... لو كل واحد فينا بيخاف ربنا وبيعمل على الأقل إللي عليه وراعينا ضميرنا... كان زماننا من البلاد الأكثر تقدماً بس للأسف
احنا مش متخلفين من شوية
وزي ما قال المتنبي زمان: يا أمة ضحكت من جهلها الأمم
ربنا يقومه بالسلامة زميلي الجميل إللي يمكن مش بتربطني بيه علاقة قوية... بس كل ما بفتكر شكله وهو كان نايم في المستشفى... شكله واحد تاني خالص غير إللي أعرفه... منظر وشه إللي كله كدمات مش بيفارقني وبفتكر من 4 سنين لما شفته بيكتب أبيات شعر على الكمبيوتر في الكلية وقريتها وعجبتني قوي وقلتله هو كان اسمه إيه إللي كاتب الشعر ده... قالي دي من تأليفي أنا وساعتها طلبت منه إني انقلها لأني بحب الشعر قوي.. وكانت بتقول

أبكي على قدر أخفاه لي الزمان ليبتليني وحدي
أبكي على عمر أمضيه في الأحزان تطوي فيه الليالي سهدي
حبيباً كان يواسيني ولكن غاب عن عهدي
كيف وأنا وليد أمس وتواً جرى في عروقي نبضي
كُتب على فؤادي البكر يشاركني أحزاني بدلاً من سعدي
فيا ليالي الغرام اسدلي الستار على حبيباً كم شرد فيه وجدي
سأتركه للوم الزمان فربما يأتي يوم يسترجع ودي

الدنيا ومشاغلها

الدنيا بقت صعبة قوي وكل واحد مشغول في مشاكل وهموم بالكوم وكل حاجة بقت صعبة ومفيش حاجة بقت بالساهل
ولا شغل ولا أكل ولا لبس ولا عيشة محترمة كويسة وبقى كل واحد عنده مشاكل كتييييييييييييييير مش عارف يخلص منها ولا لاقي حد يشيل شوية من إللي فوق كتفه... ما هو كل واحد بقى فيه إللي مكفيه... مشاغل ومشاكل وهموم ومسئوليات وتعب
بس المشكلة إننا في وسط كل ده نسينا حاجات كتير قوي حلوة وبتخفف عننا... نسينا أصحابنا وقرايبنا وأهلنا وكل الناس إللي ممكن بدقايق جميلة معاهم ننسى كل أحزاننا ونفضل نعيش سنين على ذكرياتنا الجميلة معاهم
للأسف نسيناهم في وسط مشاغلنا وبقى سهل علينا ننسى ونقسى ونبعد... نسيب بلدنا وعيشتنا وكل إللى لينا بحثاً عن أحلام وهمية وأموال زائفة فانية
وفي وسط كل المشاكل دي كل واحد نسي الإنسان الجميل إللي جواه إللي بيحب ومابينساش حد وبيساعد كل الناس... الوقت سرقنا والدنيا خطفتنا ومش بتستنى حد
وأصعب حاجة إن الواحد يقسى ويجرح أقرب الناس إليه بحجة التعب والكسل والمشاغل والمشاكل إللي مش بتخلص
كمان بقى صعب إن الواحد مننا يقعد مع نفسه يسمعها ويواجهها... مفيش وقت!!
حاجات كتير نسيناها وتاهت وراحت مننا.. تاهت معاني كل حاجة حلوة وراح طعم كل حاجة جميلة كنا بنستمتع بيها
بس لإمتى هنفضل كدة!!!! لإمتى بقى

حبيبتي

حبيبتي... كالنسمة يفوح عطرها فيجعلني طائراً مترنماً في سماء عينيها اللامعتين اللتين تنبعان بالدفء والسكون.. فأري فيهما كل شئ جميل.. فأعشق الحياة بكل ما فيها لأجلها.

حبيبتي... أحبها بجنون ليس له مثيل... أعشقها... وأعشق اللحظة التي تجمعنا معاً، ففي لحظة لؤانا أنسي الكون وما فيه... أنسي العمر وباقيه... أنسي الزمن ومعانيه... أنسي همومي وما أعانيه... أسهر الليالي وأعشق القمر وأغانيه وسط موسيقي الكون وألحان لياليه.

حبيبتي... ليست حبيبتي بل قلبي وعمري وحياتي وكل آمالي
حبيبتي... ليست حبيبتي بل صديقتي وأختي وأمي وكل ما لي
حبيبتي... أتمني أن يضمني العمر بين ذراعيها فاستريح من سهر الليالي وأوجاع خيالي وأنعم بالدفء والحنان.. لأعيش سعيداً بحبي الذي عاش بين أضلعي عمراً طويلاً فأراه شاباً لا يشيب فيتجدد شبابه دائماً بحبي وحبها.. في عمري وعمرها.. يملأ قلبي وقلبها.. وأبقي إلي أن أموت أحبها.

مع الاعتذار

أفكاري تتعارك داخلي كثيراً حتي تعبت رأسي من عراكها، فهي حبيسة داخل رأسي الصغير لا تعرف طعماً للحرية وتحاول دائماً الخروج ولكن دون جدوي فللأسف.. أنا لست تلك الشخصية التي تعبر عما بداخلها أمام الناس بسهولة إلا بحدود فأنا لست شخصاً إجتماعياً في تعاملاتي مع الآخرين.
ولكن بعد مرور سنوات لم تهدأ خلالها رأسي قررت أن أحاول تحرير كل فكرة تأتي في رأسي حالاً، فأنا أجيد إخراج أفكاري علي ورقي بما يريحني ويجعلني أشعر بتحسن.
ولكنني أقدم الاعتذار في كل لحظة لما سببته من متاعب لكل فكرة لم تعرف معني الخروج من رأسي وماتت دون أن تحيا في هذه الحياة، ومن يعلم فقد كانت من الممكن أن تحدث تغييراً في حياتي، فليس أعظم من أن تخرج أفكارك وتتغير بها دنيتك وتؤثر بها في حياة الآخرين... تموت أنت وهي تعيش وتقوم بدورها في الحياة، فما من أمنية سوي أن تعيش أفكاري وتعمر في الحياة أكثر مني ويتذكرني الناس بها وأعيش خالداً بضياءها.
ولكنني احتجت وقتاً طويلاً لأتعلم كيفية إخراج كل فكرة في موعدها الذي يجعلها تعيش مؤثرة فعالة في حياتي وحياة الآخرين فأمضيت أياماً وليالي ومازلت أقضي عمري في الحياة لأقدم

اعــتــذاري لأفــكــاري